الحلقات التكرارية iterations & looping

بسم الله الرحمن الرحيم

 

درس اليوم بعنوان

الحلقات التكرارية iterations & looping

يعني ايه iterations & looping  ويعني ايه حلقات تكرارية من الاصل

الحلقات التكرارية في الاصل هي تكرار امر معين عدد من المرات كثيرا ما نحتاج في برامجنا تكرار بعض الاوامر عدد من المرات المحددة او الغير محددة

يعني مثلا اقول لحبيبي ابو البراء قول     ارنبنا فى منور انور وأرنب أنور فى منورنا  عشر مرات مثلا

كدا انا حددت عدد التكرار هنا عشر مرات دا ان عرف يعني يقولهم او حتى اخي احمد الفلاحجي 

هنا بقي نقول ان دي جمله تكرارية محددة او معروفة وتندرج تحت الاسم  iterations

طيب لو قلت لابو البراء قول بسيطه وماتستبسطهاش وصعبه وماتصتصعبهاش لحد ما يبان لك صاحب ههههههه

كدا اول واحد هيظهر ويتعاطف مع الموقف حبيبي ابو يوسف ويقولي حرام عليك واخي الغالي عبد العزيز هيقول اشيل عنه شوية والفلاحجي هيستخبى 

طيب من المثال اللي فات فهمنا ايه انه لازم يفضل يعيد الجملة لحد ما يبان له صاحب

يعني هنا حطينا شرط لايقاف الحلقة

يبقي كدا اسمها جملة تكرارية شرطية  وتندرج تحت الاسم  looping

ومن الامثلة السابقة نقدر نقسم الحلقات التكرارية المحددة والشرطية كما بالاسفل

iterations

For.........Next

For.........Each

looping

Do.........Loop

Do...........While

Do...........Until

While

ناخد مثال على الجز الاول وهو   iterations

For.........Next

وتكتب هكذا

      
        For i = 1 To 10

            MsgBox(i)

        Next

نوضح الجمله اولا بدأنا الجملة بكلمة محجوزة For وبعدها حرف i وهو هنا يسمي بالمتغير وبالاصح العداد المتغير

وبعدها = تساوي ايه بقي تساوي القيمة الابتدائية للمتغير  to  القيمة النهائية للمتغير والتي اذا وصل لها توقف عن العمل ونختتم الكود ب Next  للتكرار حتى نهاية القيمة

يبقي المثال اللي فات ايه اللي هيحصل فيه لما نشغله

هيظهر لينا رسائل متتاليه من 1 الى 10 وبعدها تتوقف لانتهاء عمل الكود

طيب لو احنا محتاجين زيادة بمقدار مختلف يعني مثلا يزيد كل مره رقمين مش واحد زي ما موجود

يعني بدل ما يبقي 1 2 3 4 5 6 7 8 9 10

يبقي كدا مثلا 1 3 5 7 9  وطبعا مش هيجيب ال10 لان مسافتها من بعد ال9 رقم واحد يبقي هيتوقف عند ال9 فقط

ازاي نعمل الكود دا نشوف

 For i = 1 To 10 Step 2

            MsgBox(i)

        Next

زودنا هنا كلمة step 2  وهنا يعني مقدار الخطوة 2 للمتغير

طيب ينفع بدل ما ازود انقص مثلا اه تمام ينفع نعكس العمليه

        For i = 10 To 1 Step -1

            MsgBox(i)

        Next

يعني ايه الكود السابق يعني المتغير يفضل يقل من 10 لحد 1 بمقدار -1

طيب احنا هنقضيها مقدار ارقام لا ممكن  نعلن عن متغيرات تحمل الارقام دي ازاي بقي

        Dim x As Byte = 1
        Dim y As Byte = 10

        For i = x To y

            MsgBox(i)

        Next

اظن كدا واضحة لينا احنا اعلنا عن متغيرين من نوع بايت واحد قيمته1 والتاني 10

ونستطيع ان نربط المتغير بتكست بوكس مثلا اذا كانت القيمة هنحددها من على الفورم واحنا شغالين

ندخل بعد كدا على الFor Each

بنستخدم امتى الفور ايتش دي

بنستخدمها مع الكولكشن زي المصفوفات كدا مثلا

هناخد المصفوفات دي بس بعدين المهم هنعرف ازاي نعلن عنها ونعرفها في الجملة فور ايتش في المثال التالي

        Dim myarr() As String = {"الفلاحجي", "ابو البراء", "ابو يوسف", "البسكري", "ياسر العربي"}


        For Each i In myarr

            MsgBox(i)

        Next

هنا اعلنا عن مصفوفه من نوع استرنج نصي يعني وعرفناها  بما هو مكتوب بين الاقواس

وبعدها جينا لجملة التكرار For Each

ووضعنا متغير i  بيساوي المصفوفة myarr

الكود السابق عند تطبيقه سيعرض لنا الاسماء  الموجودة بالمصفوفة على التوالي داخل رسالة وعند الانتهاء من كل محتويات المصفوفة يتوقف عمل الكود

زي ما بنعملها في الاكسيل كدا مثلا

Dim rng As Range
For Each rng In Sheet1.Range("a1:a100")
rng = "الله اكبر"
Next rng

هنا بنعلن عن متغير rng وحددنا له مساحة يشتغل داخلها من الخلية a1 :a100  ونقدر نطبق على هذا النطاق ما نريده

مثلا نحدد المتغير ونقول انه  المتغير هيكون قيمته

الله اكبر

ونطاق الحلقة التكرارية هو 100 خليه  يبقي كلهم هيتكتب فيهم

الله اكبر

 

ولحد هنا نتوقف ونكمل باذن الله باقي الدرس قريبا

تقبلو تحياتي

ياسر العربي

يتبع

شارك المقال

شاركه على فيسبوكشاركه على جوجل+